«Reňklerdäki poeziýam»  atly 50 ýaş ýubileý sergi

3-nji oktýabrda Zehinli suratkeş Çarymyrat Ýazmyradowyň 50 ýaşynyň dolmagy mynasybetli Türkmenistanyň Çeperçilik sergiler müdirligi we Şekillendiriş sungatynyň sergi merkeziniň sergi zalynda nakgaşyň “Reňklerdäki pozeýam” atly şahsy sergisi açyldy. Dabaraly çärä Eýran Yslam Respublikasynyň Türkmenistandaky Medeniýet meseleleri boýunça geňeşçisi Abdolreza Abbasi, başga-da birnäçe daşaru ýurt wekilleri, Türkmenistanyň at gazanan artistleri mugallymlary we talyp ýaşlar gatnaşdylar.

Sergide Çarymyrat Ýazmyradowyň 200-den gowrak nakgaşlyk eserleri goýulypdyr. Şolaryň hatarynda Gündogaryň beýik akyldary Magtymguly Pyragynyň şygryýetini şöhlelendirýän «Aýa döndi», «Aýa sataşdym», «Bakylyga», «Mätäç eýleme», «Dananyň ruhy», «Bu derdi», medeni mirasymyza we taryhy gymmatlyklarymyza bagyşlanan «Nusaý mirasy», «Marguş»,  «Gala», «Marguş möhri», şeýle-de «Soraglar adasy», «Çynarlar», «Päklik», «Öwüşginler», «Ylham perişdesi», «Leýlisaç»,  «Mejnun», «Sazlaşyk», «Gündogar hüwdüsi» ýaly eserler bilen birlikde, rowaýatlary, halk döredijiligini wasp edýän ajaýyp işler bolar.

Serginiň başynda Türkmenistanyň Medeniýet ministrliginiň adyndan Çarymyrat Ýazmyradowa çeken zähmetleri üçin hormat haty gowşuryldy.